Amapholisa asebophe umantshi onqume kuyonale iviki ukuthi umnumzana Roy Bennet ahlawule imali yesibambiso-ibail. UMantshi uLivingstone Chipadze ubotshwe izolo ntambama njalo kuthiwa wetheswa icala elithiwa criminal abuse of office-ukwehluleka ukusebenzisa amandla esikhundla sakhe ngemfanelo. Amagqwetha alwela ilungelo loluntu athi amapholisa avimba amagqwetha, izihlobo labangane ukumbona lokumupha ukudla.
Okwakhathesi akukaziwa ukuthi uChipadze uzasiwa nini emithethwandaba. UBennet uhlawuliswe imali yesibambiso i$2000 US Dollars wathathelwa incwadi yakhe yokuhambisa i passport kuyonale iviki. UBennet nguye onikwe isikhundla sokuba ngumsekeli wezokulima.
UBrenda Moyo weStudio 7 ukhulume legqwetha elilwela ilungelo loluntu uNkosazana Anna Moyo othi ukubotshwa kuka mantshi uChipadze kuzaletha ukwesaba kwabanye omantshi labomahluli okungenza baphe izinqumo emithethwandaba ezisuthisa abalutshwane abakuZANU PF.
