Ababalisi bathi bazakhalala umsebenzi njalo abazukubuyela ezikolo ekuvulweni kwazo ngeterm ezayo nxa iholo labo lingengezelelwanga. Inhlanganiso zombili ezimela ababalisi eye Zimbabwe Teachers Association-ZIMTA le Progressive Teachers Union of Zimbabwe-PTUZ sezazise umphathintambo obona ngezemfundo uMnumzana David Coltart ukuthi bafuna iholo labo lengezelelwe.
Kusukela ngenyanga edluleyo ababalisi lezinye izisebenzi zikahulumende baqale ukunikwa ama 100 us dollars kodwa ababalisi bathi imali le kumele yengezelelwe ukuze benelise ukunakekela imuli zabo.
UBrenda Moyo weStudio 7 ukhulume loMnumzana Sifiso Ndlovu osaphethe isikhundla sika chief executive officer weZIMTA, othi ababalisi bakhangelele ukuthi uhulumende omutsha alungise konke okuhlupha ababalisi.
Kunjalonje abazali bathi ukukhalala umsebenzi kwababalisi ngeterm ezayo kuzakwenza abantwana babuyele emuva kakhulu ezifundweni zabo.Sikhulume loNkosazana Sibonile Ndlovu umzali njalo eyisiphathamandla seBulawayo Agenda, othi okwakhathesi ababalisi bebesiya sibili ezikolo.
