Ukubotshwa kwabasekeli bebandla leMDC kulokhu kuqhubekela phambili lanxa kulesivumelwano sokubumba uhulumende womanyano. Amapholisa eManicaland abikwa ebophe abanye njalo abasekeli beMDC abangamatshumi amabili lasithupha phezu kodaba lodlakela oluqhamuke kugcwatshwa umka Mnumzana Morgan Tsvangirai, uNkosikazi Susan Tsvangirai eBuhera.
Abanye abasekeli balelibandla abalitshumi lasikhombisa ababotshwe ngeviki edluleyo besetheswa icala elifanayo balelwe ukuhlawula imali yesibambiso ngoMvulo ngumantshi wase Buhera. Igqwetha elimela abanye abasekeli beMDC abangamatshumi amathathu ababotshwe ngomnyaka odluleyo kwakhululwa inengi labo abagoqela uNkosazana Jestina Mukoko, uMnu. Alec Muchadehama utshele iStudio 7 ukuthi sekusele abathathu abagoqela intathelizindaba yemfanekiso abalokhu bevalelwe.
Isiphathamandla secele leMDC elikhokhelwa nguMnu. Morgan Tsvangirai njalo engumphathintambo wezamanzi, uMnu. Sam Sipepa Nkomo utshele uChris Gande weStudio 7 ukuthi ukuqhubeka kubotshwa abasekeli bebandla lakhe yikwephula isivumelwano sikahulumende womnayano.
