UMongameli Robert Mugabe uthi imali efunwa nguhulumende
ukuze avuselele umnotho yedlula i US$5 billion. UMugabe uveze lokhu esethula uhlelo
lokuvuselela umnotho, olwe Short Term Emergency Recovery Program ngolweSine lapho acele khona amazwe afana leMelika lalawo aku European Union ukuthi esule izijeziso azethulele uhulumende wakhe.
Uhlelo lolu, lona oluqoqwe lugatsha olubona ngezemali luthi uhulumende ukhangelele ukuthi i inflation yehliswe ifike ku 10 percent kuphela ekupheleni kwalonyaka. Uhulumende ucine ukwethula isilinganiso se inflation nyakenye ngoNtulikazi lapho ebesiku 23I million percent.
Okwamanje akwazakali ukuthi i inflation imi ngaphi. Ekhuluma embuthanweni ofanayo umphathintambo wezemali uMnu Tendai Biti ukhuthaze uhulumende ukuthi ehloniphe ilungelo loluntu yikho ukuthi amamzwe omhlaba emhloniphe njalo amncedise ukuvuselela umnotho.
NgolweSithathu uMnu Biti wethule ibudget yalonyaka eye us$1 billion. Ingcwethi ecubungula ezenotho uMnu Walter Nsununguli Mbongolwane utshele iStudio 7 ukuthi ngaphandle kokuthi uhulumende elungisise ezombusazwe, kuzakuba nzima ukuthi amazwe omhlaba emphathise.
Ezinye ingcwethi kwezenotho zithi umnotho ulakho ukuvuselelwa uma uhulumende omutsha engathatha amanyathelo aqinileyo evuselela ezokulima lezokwenjiwa emigodini lokuhlonitshwa kwempahla engayisiyo yakhe, ama property rights.
Sixhume ingcwethi ecubungula ezombusazwe uMnu Zenzo Nkomo losomabhizimisi wako Bulawayo uMnu Alex Goosen ukuze
sihlaziye loludaba. UMnu Goosen uthi okwamanje kungani sokulobubelo kancane kwezamabhizimisi, okungabe kukhomba ukuthi umnotho usuqalile ukuthuthuka.
