Idale leCabinet libikwa livumile ngolweSibili ukuthi ingozi yemota ebulele uNkosikazi Susan Tsvangirai icubungulwe zingcwethi ezingasekeli hlangothi. Lokhu kwenzakala ngemva kwembiko ethi imota engqikilane leka tsvangirai, yena osinde kulingozi, ngeyesiphathamandla se Zanu PF, uMnu. Saviour Kasukuwere.
Lanxa uTsvangirai ngokwakhe ethi ubona lingozi ingelasandla somuntu phakathi uNkosikazi Theresa Makone owayengumngane kaMkosikazi Tsvangirai ubikwa ekhuthaze idale leCabinet ukuthi kumele lingozi ihluzisiswe. Inhlanganiso ye USAID evume ukuthi imota etshayane leyabo Tsvangirai ibithwele imithi yayo yazise ukuthi limota kunye lomtshayeli kaisiyo ye USAID.
Umtshayeli wemota le uMnu. Chinoona Mwaanda utshele umthethwandaba ukuthi ubezama ukuvika igodi imotha yamtshelela kodwa abaye kulindawo bathi akula godi njalo umgwaqo uqonde mpo. Okunye osekumangalise abanengi yikuthi omunye oqale ukufika okwenzakale lingozi uMnu. Gideon Staphanus Theron owenhlanganiso yabalimi abamhlophe uke wabotshwa ngoba ethethe imifanekiso yengozi.
Ingcwethi ecubungula ezombusazwe umnu. Effie Dlela Ncube utshele uChris Gande weStudio 7 ukuthi kufanele loludaba lucutshungulwe ukuze impumela ilethe ukuthembana.
