Amalunga edale lephalamende aqale ngolweSithathu uhlelo lokubuzisisa abaphathintambo bakahulumende ngokwenzakalayo kuhulumende womanyano. Omela iNyanga North kulelidale engowecele leMDC elikhokhelwa nguMnu. Morgan Tsvangirai uMnu. Douglas Mwonzora lomunye wakhe uMnu. Willas Madzimure omela iKambuzuma babuze umphathintambo wezomthetho uMnu. Patrick Chinamasa ukuthi kulicala na ukuthi umuntu owathathelwa izifuyo zakhe ngesikhathi sokhetho nyakenye athi uyazifuna lezi zifuyo.
Yena uChinamasa uphendule wathi bonke abathathelwe izifuyo kumele baye emthethwandaba lapho abazathola khona uncedo.
Kunjalo nje, umkhokheli welinye lamacele eMDC uMnu. Arthur Mutambara wethule amazwi akhe akuqala kulelidale. UMutambara utshele lelidale ukuthi ukuze ilizwe lithole uncedo lwamanye amazwe kumele kumiswe udlakela lokuthathwa kwamapulazi. Ukhuthaze njalo ukumanyana kwesizwe esithi amanye amabandla asezibona emakhulu kulamanye. Omela i Insiza north edale lephalamende engowecele leMDC elikhokhelwa ngu Mutambara uMnu. Siyabonga Malandu ncube utshele uChris Gande weStudio seven ukuthi uMutambara uthe kuqakathekile ukuthi amabandla ahloniphane.