UMongameli Robert Mugabe ube lomhlangano lenhloko kahulumende uMnu Morgan Tsvangirai kanye lomsekeli wakhe uMnu Arthur Mutambara ngoLwesine eHarare bekhulumisana ngodaba lwento ezilokhu zihlupha kusivumelwano sokubunjwa kukahulumende womanyano phakathi kweZanu PF lamacele womabili eMDC.
Abathathu laba bakhulumisane ngodaba lwabosibalukhulu bezabelo, abameli beZimbabwe kwamanye amazwe, udaba lokufungiswa ukuqala umsebenzi kuka Mnu Roy Bennett lokunye okunengi nengi.
Imbiko esiyamukeleyo iveza ukuthi abathathu laba lokhu bedonselana, uMugabe engafuni ukulalela.
Kodwa umphathintambo obona ngokwenzakala emawofisini kaMnu Tsvangirai uMnu Gorden Moyo utshele iStudio 7 ukuthi kube lokukhulumisana kuhle emhlanganweni wanamuhla, esithi kukhona lapho abathathu laba abavumelana khona. Uthi bazahlangana njalo ngoMvulo.
