Abalandeli beqembu lenguqu ele Highlanders bakhuza umhlola phezu kokuba umdlalo wangeNsonto phakathi kweqembu labo lele Dynamos uzakuba sesigodlweni.
I Highlanders izadlala umdlalo wayo wesithathu ingekho ekhaya amaviki elandelana lapho idibana le Dynamos e Rufaro okuyinto etshiye abalandeli bomdlalo abanengi ko Bulawayo betshayana ngamakhanda bedinga ukuzwisisa ukuba lokhu kubangelwa yini njengoba uluhlu lwemidlalo yalonyaka ye PSL lukhomba ukuba lumdlalo wawuhlelwe ukuba udlalelwe ekhaya le Bosso.
Iqembu le Highlanders libikwa liyilo elikhonone ngokuthi isiminengi iminyaka kuyilo eliqala ukudlala lisekhaya emidlalweni yalo eyeligi lele Dynamos yikho i Dynamos le PSL bavuma ke ukuba lonyaka iqale esigodlweni.
I Dynamos izabe iqeqetshwa ngu Elvis Chiweshe ngemva kokuba u David Mandigora eyekele umsebenzi ngoba esebhuqwe kanengi njalo umdlali we Dembare oke wadlala laku Highlanders u Thomas Sweswe uthi i Dynamos izavukela ku Highlanders ngeNsonto ngemva kwenguquko eze lo Chiweshe.
