UMongameli Robert Mugabe, lenhloko kahulumende uMnu. Morgan Tsvangirai lomsekeli wakhe uMnu Arthur Mutambara babikwa sebevumelene ezintweni ezinengi ebezigwenxa uhulumende womanyano.
Izinto esezisele kungelakuvumelana zigoqela ukunciphisa amandla kamphathintambo wezokuhanjiswa kwembiko lokukhethwa ngumugabe kukasibalukhulu webhanga lesizwe, iReserve Bank, uMnu. Gideon Gono. Lokhu kubikwa kuzahluzisiswa ngabathathu laba ngoMvulo kumbe olwesibili.
Abazi ngokwenzakala kulezi nkulumo bathi uMugabe ukhanya elume owangaphansi edabeni luka Gono okungaba yinto engaphetha ibizelwa umlamlankuzi, uMnu. Thabo Mbeki. Kodwa uMugabe ubikwa elakho ukuyekethisa inhliziyo yakhe kuloludaba ngoba laye ulaso isifiso sokubona uhulumende womanyano ephumelela.
Isikhulumi secele leMDC ekhokhelwa ngu Tsvangirai koBulawayo, uMnu. Felix Mafa, njalo oyingcwethi ecubungula ezombusazwe utshele uChris Gande weStudio 7 ukuthi uMongameli Mugabe ukhanya efuna ukuthi uhulumende womanyano aphumelele kodwa ikhona enye inkokheli yebandla lakhe engafuniyo lokhu.
