Intathelizindaba ezimbili ezisebenzela iphephandaba le The Zimbabwe Independent zibotshiwe eHarare ngemva kokuya enkambeni yeHarare Central lapho ezikade zibizwe khona ngamapholisa.
NgoMgqibelo amapholisa angene emahofisini aleliphephandaba esithi adinga abahleli ababili abathi uVincent Kahiya lo Constantine Chimakure phezu kodaba lokuvezwa kwamagama ensoli lamapholisa abikwa ethumbe ahlukumeza abasekeli be MDC. Amagama la ethulwe emthethwandaba lapho kuthoniswa abasekeli beMDC laba.
Intathelizindba lezi ebeziphelekezelwa ligqwetha lazo, uMnu. Innocent Chagonda zivalelwe zisetheswa icala lokwephula umthetho we Criminal Law and Cordification Act. UChagonda utshele iStudio 7 ukuthi ababili laba bakhangelelwe ukuya emthethwandaba kusasa.
Umgcinisihlalo wenhlanganiso ebona ngokusebenza kuhle kwezokwethulwa kwembiko, iMISA-Zimbabwe, Umnu. Loghty dube laye ongumhleli njalo wephephandaba le the zimbabwe independent utshele uchris gande westudio 7 ukuthi isenzo lesi siyamangalisa ngoba siza ngemva kwelanga elilodwa kugqitshwe umhlangano wentathelizindaba lohulumende ngokusebenza zikhululekile.
Kunjalo nje, ingcwethi kwezomthetho, umnu. Job sibanda utshele uchris gande westudio7 ukuthi phansi komthetho we Criminal Law Cordification Act kaboni intathelizindaba lezi zilecala ngoba amagama la okuthiwa ziwavezile aphume emthethwandaba.
