Icele leMDC elikhokhelwa nguMnu Morgan Tsvangirai selikhuthaze usibalukhulu webhanga elikhulu lelizwe uMnu Gideon Gono legqwetha elikhulu likahulumende uMnu Johanes Tomana ukuthi batshiye umsebenzi ngoba ukuba khona kwabo kuphazamisa ukusebenza kuhle kohulumende womanyano.
Embikweni eliwethule ngoLwesibili icele likaTsvangirai lisole kakhulu imbiko ethulwe nguMongameli Mugabe izolo eyokuthi uGono kasoze asuke esikhundleni ngoba kungekho okubi akwenzileyo.
Kodwa iMDC ithi ukuze kubonakale ukuthi uGono ubewuqhuba ngemfanelo umsebenzi wakhe kuminyaka edluleyo kungakabi lohulumende womanyano, kumbe hatshi kumele kubunjwe ikomidi ezamcubungula.
UMnu Nelson Chamisa, oyisikhulumi seMDC kaTsvangirai ugcizelele imbiko yebandla lakhe esithi bafuna uGono loTomana batshiye umsebenzi yikho ukuthi kube lengqubelaphambili elizweni.
Isadc sicelwe ukuthi ingenele kuxazululwe loludaba. Ingcwethi ecubungula ezombusazwe uMnu Immanuel Hlabangana uthi ngempela kumele uGono esuswe esikhundleni sakhe, kodwa uthi lokhu akusoze kwenzakale kalula.
