Icele leMDC elikhokhelwa nguMnu Morgan Tsvangirai lithi lifuna kuqhutshwe ukhetho olukhululekileyo ekupheleni kokulotshwa kwesisekelo sombuso esitsha.
Isinqumo lesi siphume emhlanganweni weNational Conference yaleli cele oqhutshelwe eHarare ngempelaviki. Isivumelwano sokubumba uhulumende womanyano phakathi kwebandla leMDC leZanu PF sithi isisekelo lesi kumele sibe sesiphelile ukulotshwa ngemva komnyaka owodwa lengxenye.
Umhlangano we National Conference yebandla likaTsvangirai unqume njalo ukuthi ibandla leli lifuna uhulumende womanyano enakekele bonke abathintwe ludlakela lwezombusazwe nyakenye.
Ibandla leli linqume njalo ukuthi kumele usibalukhulu webhanga elikhulu lelizwe uMnu Gideon Gono kanye legqwetha elikhulu likahulumende uMnu Johaness Tomana batshiye umsebenzi.
Likhuthaze njalo umanyano weSadc ukuthi ubize umhlangano wesiphangiphangi kuhlaziywe udaba lokungavumelani okukhona kuhulumende womanyano phezu kodaba lukaGono loTomana kanye labo sibalukhulu bezabelo.
Lelibandla linqume njalo ukuthi lifuna uhulumende elalele okufunwa zinhlanganiso ezizimeleyo mayelana ngokulotshwa kwesisekelo sombuso esitsha. Lengeze lathi lifuna wonke amabutho kanye labasekeli beZanu PF abalokhu bebonakala endaweni ezinengi, ikakhulu emaphandleni, basuswe.
Sixhume ingcwethi ecubungula ezombusazwe njalo engumqondisi wenhlanganiso yeDiaspora Dialogue uMnu Immanuel Hlabangana sambuza ukuthi kambe singabona na iZanu PF ilandela izinqumo zeMDC?
