Inhloko kahulumende uMnu Morgan Tsvangirai sekhuthaze ukulondolozwa kokuthula emazweni ezwekazi le Africa esithi ukulwisana okukhona kwamanye amazwe, okugoqela lokho okuke kwaba khona eZimbabwe phakathi kweMDC leZanu PF ngomnyaka odluleyo kuphazamisa kakhulu inhlelo zokuthengiselana.
Ekhuluma emhlanganweni weCOMESA oqhutshelwa eVictoria Falls namuhla, owokuhlaziya indaba zokuthengiselana ngokukhululekileyo emazweni akumanyano lo, uTsvangirai uthe ukufuthelana lokulwisana okube khona phakathi kweMDC leZanu pf ngomnyaka odluleyo kubuyisele muva inthuthuko yelizwe.
Ukhuthaze inkokheli yezwekazi le Africa jikelele ukuthi ibambane kube lokuthula kuleli zwekazi ukuze kuqedwe ubuyanga njalo kuthuthukiswe inhlelo zokuthengiselana. UTsvangirai ukhuthaze njalo amankampani azimele wodwa ukuthi aphathise uhulumende ukuvuselela umnotho njalo kuqedwe ubuyanga.
Injongo yomhlangano lo ngeyokuqinisa ubudlelano kwezokuthengeiselana phakathi kwamazwe aku COMESA ukuthi adlelana kuhle kungela mithelo ebhadalwayo. Abaphathintambo bezemali emazweni aku COMESA babikwa beke bahlala owabo umhlangano bodwa namuhla bedinga indlela zokubumba isikhwama sokuphathisa uhulumende weZimbabwe.
I COMESA ilamalunga alitshumi lathoba minwe mibili, agoqela iZimbabwe, Burundi, Kenya lamanye. I Zimbabwe yiyo esingumgcinisihlalo we COMESA, isikhundla ekade siphethwe yi Kenya.
UMnu Welshman Ncube ngumphathintambo obona ngezamankampani kanye lokuthengiselana elizweni. Sixhume uNcube ese Victoria Falls wasichasisela okunengi abajonge ukuthi kufezwe ngumhlangano lo.
Kusenjalo, uSithandekile Mhlanga we studio 7 uxoxe loMnu. Rejoice Ngwenya, ingcwethi ecubungula ezombusazwe, endawonye lo Mayor we Victoria Falls uMnu. Nkosilathi Jiyane, besipha imbono yabo ngodaba lwe COMESA. UNgwenya uqale ngokuchasisa ukuthi iCOMESA ivele iyikuyini.