Igcwetha elilodumo uMnumzana Alec Muchadehama unikezwe amasamanisi okuba amiswe phambi komthethwandaba kamantshi ngecala aletheswayo lokuphazamisa ukusebenza komthetho kulandela ukukhululwa kwezibotshwa ezithi uMnu Gandi Mudzingwa, Khisimusi Dlamini lo Anderson Manyere.
Amapolisa e Law and Order afike emthethwandaba we High Court ngezikhathi ze mini athola uMnumzana Muchadehama ephakathi kwedale emela amalunga e MDC amane alesicelo kulelo dale sokuba udaba lwawo lidluliselwe phezulu kudale le Supreme ukuze lihlolisise ngokwephulwa kwamalungelo awo.
Amapolisa la amelele phandle kwedale amnikeza lawo ma samanisi ephuma ngezikhathi zokudla kwemini. Ama samanisi la esilawo athi uMuchadehama uzamele avele edale lika mantshi e Rotten Row zimhla ka 17 June 2009 ngo half past 8 ekuseni ukuzothonisiswa kucala aletheswayo lokuphazamisa ukusebenza komthetho ngokuphathisa izibotshwa lezi ukuba zikhululwe entolongweni ngendlela engaisiyo.
