Intathelizindaba zidideke inqondo ngodaba lokubana ziphatheke na kukhomisheni efuna ukubunjwa nguhulumende ukukhangela imisebenzi yezokuqutshwa kwembiko, iZimbabwe Media Commission kumbe hatshi. Kulokwehlukana imbono kudaba lolu ezinye intathelizindaba zisithi kungangcono ziphongukungena kulikhomisheni zilwisane lohulumende ziphakathi kwayo ezinye zisithi vele kumele likhomisheni ihle ifulathelwe zinthathelizindaba.
Uhulumende unxuse intathelizindaba labanye
nje abafuna ukuba ngamakhomishina ukuba babhalise njalo kusasa lilanga lakucina
lokwenza lokho.
Ezinye intathelizindaba zithi zesabela ukuthi zingekela ukungena kule ikhomisheni kuzangena abantu abafana labo Mnu Tafatawona Mahoso abakade bevele bekukhomisheni esanda dhilizwa ebingafunwa nguzulu.
Ukuze sihlaziye loludaba uChris Gande weStudio 7 uxoxe lomgcinisihlalo wenhlanganiso ebona ngokuqutshwa kwembiko, iMISA, uMnu. Loughty Dube endawonye lesiphathamandla senhlanganiso yezokuqutshwa kwembiko, iradio dialogue, uMnu. Zenzele Ndebele. UDube usungula ingxoxo ngokuchasisa ngodaba lokulotshwa kwamagama amakhomishina.
