Umsekeli ka mongameli welizwe uNkosazana Joyce Mujuru ukhangelelwe ukufika lamuhla e New York emhlanganweni oqoqwe yi United Nations oyabe uhlolisisa ngokuwa komnotho emhlabeni jikelele, i Global Financial and Economic Crisis.
Umanyano lo uthi ukuwa komnotho lokhu kuzabangela ukuthi amazwe angakathuthuki, njengawe Africa, asalele emuva nxa amanye amazwe esephuma kuloluhlupho.
Ekhuluma esegcekeni lendizamtshina eHarare lamuhla, uNkosikazi Mujuru utshele intathelizindaba ukuthi kuhle ukuthi amazwe asathuthukayo lalawo asethuthukile ahlale ndawonye abonisane ngaloludaba.
UMnu. Dumaphi Mema, ingcwethi ecubungula ezombusazwe, utshele uSithandekile Mhlanga we studio 7 ukuthi kufanele eleZimbabwe libesemhlanganweni enjengale kodwa kuyazakala ukuthi umnotho walo ungabangcono uhulumende engantshintsha indlela abusa ngayo.
