Inhloko kahulumende uMnu Morgan Tsvangirai uqhubekele phambili ngohambo lwakhe emazweni aphetsheya ngoMvulo ngokuhlangana lomkhokheli weBritain uMnu Gordon Brown esigodlweni salelo lizwe iLondon bekhulumisana ngodaba loncedo olufunwa yiZimbabwe lokuvuselela ubudlelwano phakathi kwamazwe womabili.
Ekhuluma lentatheli ngemva kokuhlangana loTsvangirai, uMnu Brown uveze ukuthi uhulumende wakhe uphe eleZimbabwe i5 million pounds ezasetshenziswa kwezemfundo kanye lokuthengela uzulu ukudla.
Wengeze wathi imali esiphiwe iZimbabwe yiBritain lonyaka sikike ku 60 million pounds.
UBrown uthe uyajabula kakhulu ngenguquko elethwe nguhulumende
womanyano, kodwa uthe ufuna kube lenguquko ekhanyayo egoqela ukuqhutshwa kokhetho
olukhululekileyo lokuguqulwa kwendlela ibhanga elikhulu lelizwe
elisebenza ngayo ukuze aphathise uhulumende ngemali yokuvuselela umnotho.
Ekhuluma emhlanganweni munye uTsvangirai uthe uhulumende uzimisele ukusebenza gadalala ukuletha inguquko efunwa ngamazwe aphetsheya elizweni ukuze ephathise iZimbabwe.
Kunjalo nje, ingcwethi ecubungula ezombusazwe uMnu Brilliant Mhlanga uthi ukuhlangana kuka Brown loTsvangirai kuqakathekile njengoba kungokwakuqala esikhathini eside ukuthi inkokheli yamazwe womabili ikhulumisane ngodaba lokudlelana.
