Inhlanganiso ebona ngezempilakahle lenhlelo zabantwana emhlabeni jikelele, i UNICEF, ithi elezimbabwe lilakho ukubhekana njalo lomkhuhlane wesihudo secholera nxa izulu lingaqalisa ukuna kunyanga ezinhlanu ezilandelayo.
Okwakathesi inani lababanjwa yilumkhuhlane, obulele abantu abedlula inkulungwane ezine selehle kakhulu okokuthi akuselamuntu obanjwe yilumkhuhlane ensukwini ezisanda kwedlula. Isikhulumeli se UNICEF eZimbabwe, uNkosazana Tsitsi Singizi utshele intathelizindaba izolo ukuthi ukusilela kwamanzi ahlanzekileyo emizini enjenge Budiriro le Glenview eHarare kulakho ukwengezela ukumemetheka kwalumkhuhlane.
Umsekeli kamgcinisihlalo wenhlanganiso yezakhamizi zeHarare, iCHRA, uNkosazana Beatrice Khumalo utshele uChris Gande weStudio 7 ukuthi limbiko iliqiniso ngoba amanzi elokhu esilela.
