Izakhamuzi zedolobho le Mutare zithi zidaniswe kakhulu yikwehluleka ukuthola ithuba lokubonana labenkampani ye Kimberly process abaselizweni ukuzohlolisisa udaba lokwephulwa kwelungelo loluntu ko Chiadzwa esigabeni seMarange.
Abanye esikhulume labo abagoqela inkokheli yebandla le MDC bathi abe Kimberly Process kade bephelekezelwa yiziphathamandla zikahulumende esigabeni seManicaland ezibavimbe ukubonana labantu abahlukuluzwa lokubulalelwa izihlobo, akade befisa ukunika izikhalazo lobufakazi.
Abe Kimberly Process baselizweni okweviki yonke njalo iqula leli likhokhelwa ngobona ngezemigodi kwele Namibia uMining Commssioner uMnumzana Kennedy Hamutenya Lipunye. uhambo lwabo luza ngemza kokwethulwa kombiko yinhlanganiso ye Human Rights Watch othi kulabantu abedlula amakhulu amabili ababulawa ngamapholisa lamasotsha e Chiadzwa bedinga amadiamonds. Uhulumende uyakulandula lokhu.
Sikhulume lesakhamuzi seDangamvura eMutare esingathandanga ukuqanjwa ngegama sisesabela impilo yaso, esilandisa ngochuku lwamasotsha lamapholisa eChiadzwa.
