Umphathintambo wezemali, uMnu. Tendai Biti usephinde njalo amazwi akhe okuthi ukusetshenziswa kwedola leZimbabwe kusasekude. Lamazwi ehlukene lakamongameli Mugabe otshele intathelizindaba kumaviki amabili adluleyo ukuthi idola lezimbabwe kumele liqale njalo ukusetshenziswa masinyane ngoba uzulu, ikakhulu owemaphandleni, ethwele nzima ngokusilela kwemali yakwamanyanye amazwe.
Kunjanlo nje, umphathintambo wezokuvuselelwa kwemisebenzi lamafekitali, uMnu. Welshman Ncube utshele umhlangano weAfrican Forum kweleBhilitane ngoMvulo ukuthi kuzakwenziwa imizamo yokuvumelana leSouth Africa ukuthi iRand kube yimali esetshenziswayo okusemthethweni njengalokhu okwenziwa yiSwaziland, Lesotho leNamibia.
Ingcwethi ecubungula ezenotho yelizwe, uMnu. Daniel Ndlela utshele uChris Gande weStudio 7 ukuthi ukusetshenziswa kwedollar leZimbabwe kungabisela kakhulu imizamo yokuvuselela inotho yelizwe.
