Abalwa impi yenkululeko labasekeli bebandla leZanu PF baphazamise ukuqhutshwa komhlangano wokulotshwa kwesisekelo sombuso esitsha eHarare ngoMvulo batshaya abantu ekade beze ukuzophatheka kulumhlangano ngembhodlela zamanzi.
Ibandla leMDC litho kulokhansila walo otshaywe yimbodlela walimala kakubi. Umhlangano lo ucine umiswa usanda kuqala, njalo suzaqhutshwa ngolweSibili. Ukufuthelana kuqale ngemva kokuba amalunga eZanu PF eqalise ukuhoza umgcinisihlalo wedale lephalamende uMnu Lovemore Moyo lapho evula lumhlangano.
Abe MDC babikwa becunulwe yisenzo seZanu PF labo baqalisa ukuhlabela ingoma zebandla labo. AbeZanu PF baqhubeke behlabela ingoma ethi "Zanu PF ndeeropa," okutsho ukuthi iZanu PF ngeyegazi ngesiNdebele.
UMongameli Mugabe labanye bakhe kuhulumende womanyano lo abathi umnu Morgan Tsvangirai loMnu Arthur Mutambara bahlangene ngemva kokumiswa komhlangano lo bekhulumisana ngokwenzakeleyo.
UTsvangirai loMutambara babikwa behambile kumhlangano omkhulu wesisekelo sombuso kodwa kabasangenanga lapho obuqhutshelwa khona ngoba uMongameli Mugabe ubengekho.
Bathe sebekhulumisana laye ntambama wabazisa ukuthi ubengabuyanga kumhlangano wokulotshwa kwesisekelo sombuso esitsha lo ngoba enganxuswanga.
Ekukhulumisaneni kwabo abathathu laba bavumelene ukuthi umhlangano omkhulu lo kumele wenziwe ngoLwesibili, bavumelana njalo ukukhuza abasekeli bamabandla abo ukuthi eziphathe.
Amapholisa abikwa engazange alokothe angenele.
