Icele le MDC elikhokhelwa nguMnu. Morgan Tsvangirai selithembise amalunga alo ukuthi lizalwisa ukuthi ukulotshwa kutsha kwesisekelo sombuso kwenziwe ngendlela efiswa nguzulu njalo indaba ezilokhu zihlupha kuhulumende womanyano kanye lakubandla labo zilungiswe.
Lokhu kuvezwe zinkokheli zalelibandla, ezigoqela uMnu. Lovemore Moyo, okhulume emhlanganweni omkhulu obuse Dingumuzi e Plumtree, kanye lo Mnu. Nelson Chamisa, okhulume komunye njalo eBikita e Masvingo ngeSonto.
Ibandla leli likhala ngokuhlukuluzwa kwamalunga alo ngamapholisa, ukuba madolonzima kukahulumende ukugcoba elinye ilunga lalo, uMnu. Roy Bennett kanye labanye ukuthi baqale umsebenzi kuhulumende womanyano, lokunye okutshiyeneyo.
Isiphathamandla salelibandla, uMnu. Seiso Moyo, omela iNketa edale lephalamende obesemhlanganweni obuse Plumtree, uchasisele uSithandekile Mhlanga we Studio 7 okunengi okwenzakale kuwo.
