Icele leMDC
elikhokhelwa nguMnu Morgan Tsvangirai lithi incwadi ebilohlamvu phakathi
ethunyelwe endlini kanobhala jikelele walo uMnu Tendai Biti ithunyezwe
ngabantu bebandla leZanu PF ngenjongo yokumethusela.
Incwadi le ifike endlini kaBiti ngeviki edluleyo kodwa wayivula ngoMvulo, lapho athole khona uhlamvu lombhobho lencwajana ebimxwayisa ukuthi ehlele esaphila indlela afuna ilifa lakhe liphathwe ngayo.
UBiti ngumphathintambo njalo wezemali. Ibandla leMDC lithi selengezelele inani labantu abalinda uBiti kulandela isehlakalo lesi. Amapholisa abikwa engakabophi muntu ngesehlakalo lesi.
Umsekeli wesikhulumeli saleli bandla uNkosazana Thabitha Khumalo uthi uMnu Biti engehlelwa ngokubi, kabasoze badinge umthakathi ngoba bemazi - iZanu PF. Imizamo yokukhuluma leziphathamandla zeZanu PF ngaloludaba yehlule.
Kolunye udaba, amapholisa abika ukuthi sebophe abantu abayisikhombisa abacatshangelwa ukuthi yibo abagqekeze endlini kaNkosikazi Priscillar Misihairambwi-Mushonga ngenyanga edluleyo bantshontsha impahla yakhe egoqela umbobho, imota kanye lemali.
Abantu laba babotshwe ngeSonto eHarare njalo abathathu babo badutshulwe ngamapholisa balimala ngemva kokubana bezame ukwala ukubotshwa, kubika isikhulumeli samapholisa uMnu Wayne Bvudzijena.
