Unobhala wezomvikela kucele leMDC elikhokhelwa nguMnu. Morgan Tsvangirai esigabeni seManicaland, uMnu. Jack Robert Saunyama ubotshiwe lamuhla esetheswa icala lokubangela udlakela. Ibandla leli lithi amalunga alo, esigabeni lesi ancintisa kukhetho lokudinga amalunga edale lephalamende asedlela evalweni ngoba ekhanya esebotshwa kungelazizatho.
Esinye isiphathamandla salelibandla esigabeni lesi, uMnu. Mathew Makuyana sigwetshelwe ukuhlala entilongweni okweminyaka ethoba munwe munye. Icala lokweba umakhalekhukwini eletheswa omela inkulumane edaleni lephalamende njalo engumsekeli kamphathintambo wezabakhulayo, uMnu. Thamsanqa Mahlangu ebelikhangelelwe ukuhlaziywa emthethwandaba lidluliselwe kusasa.
UMahlangu, ongumgcinisihlalo wabasakhulayo kucele leMDC elikhokhelwa nguMnu. Morgan Tsvangirai, wetheswa icala lokutshontsha umakhalekhukhwini kamnu. Joseph Chinotimba, umkhokheli wabalwa impi yenkululeko. Amantombazana amabili etheswa icala linye lomahlangu lawo akhangelelwe ukulethwa emthethwandaba kusasa. Ingcwethi kwezemithetho njalo eligqwetha elilodumo, uMnu. Job Sibanda utshele iStudio 7 ukuthi njengoba uMahlangu engumuntu ohloniphekayo njalo esazakala bekungamelanga avalelwe esitokisini icala lingakathoniswa ngoba abavalelwayo ngabalakho ukubaleka icala lingakathoniswa.
Ingcwethi ezicubungula ezombusazwe zithi kukhanya injongo yokubotshwa kukaMahlangu lanxa engaba lecala, kuyikumyangisa kuphela. UMahlangu ubotshwe emhlanganweni owawugcwele abantu ngolwesibili. USibanda utshele uChris Gande weStudio 7 ukuthi amapholisa alamandla okuzikhethela ukuthi avalele umuntu kumbe hatshi laloba elesikhundla emphakathini.
