Abanikazi bamabhazi ako Mhunga sebekhiphe amabhasi abo emigwaqweni ngemva kwengozi eyenzakele izolo emgwaqweni weHarare-Masvingo kwafa abantu phose amatshumi amane. Le yingozi yesibili yebhasi yako Mhunga phakathi kwenyanga ezine ezedluleyo. Eyinye ingozi yenzakele ngenyanga kaApril eChivu kwafa abantu phose amatshumi amathathu.
Izakhamizi zeMasvingo ezikhulume leStudio 7 zithi abantu abazondiswe zingozi zamabhasi ako Mhunga baqale ukujikijela amabhasi akade engena evela ezigabeni ezimbalwa ngamatshe , okungabe kuyikho okubangele ukuthi basuse amabhasi abo emigwaqweni.
Kodwa umphathintambo wezokuhambisa lokuthwalwa kwezinto uMnumzana Nicholas Goche ubikwa ethule umbiko wokwesula incwadi zokuhamba kwamabhasi ako Mhunga emigwaqweni emisakazweni ye ZBC. Isiphathamandla sako Mhunga uMnumzana Elphas Musungwa uthe ukwesulwa kwencwadi zabo bakuzwele emisakazweni, esithi uhulumende kakabazisi ngalelinyathelo. UMusungwa uthi ingozi yayizolo ibatshiye bethithibele bephelelwe ngumcabango njalo bengazi ukuthi baqalisele ngaphi.
UMusungwa uthe basuse amabhasi emigwaqweni ngoba bekhala lezihlobo zalabo abafele engozini esithi balesifiso sokuthi bazabuyisela amabhasi abo emigwaqweni nxa izinto sezipholile, wathi okwenza kukhanye angani amabhasi abo enza ingozi ezinengi yikuthi balambhasi amanengi emigwaqweni ukwedlula amanye amankampani amabhasi.
Sikhulume lesakhamizi seNkulumane ko Bulawayo uNkosazana Siphathisiwe Ncube othi ngempela ingozi zamabhasi ako Mhunga ziyethusa.
