Inhloko kahulumende uMnunzana Morgan Tsvangirai uhlangane loMongameli Ian Khama weleBotswana, ngolweSibili esigodlweni selizwe lakhe iGaborone phezu kwendaba ezihluphayo kuhulumende womanyano eZimbabwe. UTsvangirai uthi noma kulokunye okusalele kulenga, kulengqubela phambili kuhulumende womanyano.
UMnunzana Tsvangirai utshele uMongameli Khama ukuthi abavumelani loMongameli Robert Mugabe ngodaba lokuqhatshwa kuka sibalukhulu webhanga yeZimbabwe uMnunzana Gideon Gono kanye lowe ndaba zomthetho uMnunzana Johanes Thomana. Ukuphuza ukuqedisisa amabizo abosibalukhulu bezabelo kanye lokungena kuhulumende kukaMnunzana Roy Bennet owe MDC lakho kuhlafuniwe nguTsvangirai kanye loKhama. UTsvangirai utshele uKhama ukuthi usekhulume loMongameli Jacob Zuma weSouth Africa ngendaba zonezo ezisalele zilenga kuhulumende womanyano esithi ulethemba lokuthi zizalungiswa.
Kunjalo nje, ingcwethi ecubungula ezombusazwe uMnu. Emmanuel Hlabangana utshele uChris Gande weStudio 7 ukuthi uhambo lukatsvangirai lolu luveza mgceke ukuthi kaselamacebo okulungisisa osekusele kusivumelwano sikahulumende womanyano.
