Ibandla le Democratic Alliance kwele South Africa litshele intathelizindaba lamuhla ukuthi ukudingisisa elikwenze ezimbabwe ngeviki edluleyo kuveze ukuthi umongameli Robert Mugabe ulungiselela impi esabekayo ngokhetho oluzayo.
Inhlanganiso le ithi sokulezikhali elizweni ezokusebenzisa kulimpi njalo umugabe uxoxisana lamazwe agoqela ele Korea, Cuba, Venezuela kanye lele South Africa ukuthi azengezelele. Ababili abakade besenza ukudingisisa lokhu, ngoMnu. Wilmot James lo Kenneth Mubu abangamalunga edale lephalamende kubandla le DA njalo bathi baxoxe leziphathamandla zikahulumende womanyano kanye lenhlanganiso ezizimeleyo eZimbabwe ngaloludaba, ezibaqambe ngamabizo.
Kodwa esinye seziphathamandla zikahulumende lezi esingathandanga ukuqanjwa ngebizo sitshele istudio 7 ukuthi bakhulume le DA ngokuthi kulengxabangxoza elizweni efuna ukulungiswa hatshi ukuthi kulempi eqoqwa nguMugabe. Yena uButu utshele lumsakazo ukuthi bama ngabakutshoyo njalo bafuna umongameli Jacob Zuma we South Africa angenele amise impi kaMugabe le ezayo.
