UMongameli Robert Mugabe njengemvama, uchothoze amazwe angentshonalanga ngoMvulo ngokungafuni ukunikeza eleZimbabwe uncedo lanxa sokulohulumende womanyano.
UMugabe wethule amazwi la emngcwabeni kaMnu Joseph Msika eHeroes Acre eHarare. UMsika, yena obengomunye wabasekeli bakaMugabe ubhubhe ngeviki edluleyo ngemva kokugula okwesikhathi eside.
Njengenhlalayenza uMugabe usole kakhulu amazwe athuthukileyo afana leMelika leBhilithani esithi amazwe la alobandlululo njalo kafuni ukubona eleZimbabwe liphumelela, yikho nje engafuni ukuphathisa uhulumende womanyano ngoncedo aludingayo.
Ngalokhu, uMugabe uthe eleZimbabwe lizazidingela abanye abangane elizadlelana labo kuhle abangabandlululi ngemihlobo njengamazwe angentshonalanga. Ebekwa umsika ngoMvulo, bekulikhefu njalo lokutnanza amaqhawe elizwe, i Heroes Day.
Izisebenzi lezakhamizi zakoBulawayo zinanze ikhefu lamaqhawe leli zisidla ingqweqwe zomlomo ngoba zibhekane lokusilela kwemali emabhanga, kanti njalo izinto zilokhu zingamanga kuhle elizweni.
Ukuhlaziya amazwi kaMugabe lokubaluleka kwelanga leHeroes day uSithandekile Mhlanga weStudio 7 uxhume uMnu Max Mkandla ongumkhokheli wenhlanganiso yababengabalweli bempi yenkululeko, i Zimbabwe Liberators Peace Initiative.