Umongameli Robert Mugabe lomsekeli wakhe uNkosikazi Joyce Mujuru, inhloko kahulumende uMnumzana Morgan Tsvangirai, lomsekeli wakhe uMnumzana Arthur Mutambara namhlanje bamanyene labemuli yako Mushonga ngemva kokulahlekelwa kwayo ngudokotela Christopher Mushonga, obhubhele emzini wakhe e Mt Pleasant eHarare ngoMgqibelo.
UMushonga ubengumka Nkosikazi Priscilla Misihairambwi Mushonga umphathintambo obona ngezokusebenzelana kwele Zimbabwe lamanye amazwe, engumsekeli kanobhala jikelele weMDC ekhokhelwa nguMnumzana Mutambara.
UMushonga obeseleminyaka engamatshumi ayisikhombisa lantathu-73, ubikwa ebulewe ngamanxeba awathole ngemva kokutshaywa kakubi yizikliwi ezimngenele emzini wakhe eMt Pleasant ngenyanga kaJune. IStudio 7 ikhulume lomnewabo kamuyi uMnumzana Zacharia Mushonga othi bacele uMugabe ukuthi abone ukuthi izikliwi lezi ziyalethwa emithethwandaba.
UMushonga ukhangelelwe ukungcwathwa ngolweSihlanu kibo eChishawasha Mission. Utshiye abantwana abayisitshiyagalolunye lomzukulu oyedwa. Sikhulume losomabhizimisi weHarare uMnumzana Chemist Siziba, umngane wakhe , othi udabuke kakhulu ngemfa yomngane wakhe owesikhathi eside.
Kunjanlo nje ilunga ledale lephalamende emzini weMakhandeni koBulawayo, uMnumzana Corneliuus Dube obhubhe ngoMgqibelo esibhedlela seMarter Dei ko Bulawayo uzabekwa ngolweSithathu emathuneni awe West Park ko Bulawayo.
UDube utshiye uNkosikazi labantwana abane. Sixhume ilunga ledale lephalamende elimela iLuveve uMnumzana Reggie Moyo osebenze lomuyi kubandla le MDC elikhokhelwa nguMnumzana Morgan Tsvangirai.
Ezinye Indaba ZeStudio7...
