Kulabantu abalitshumi lanye abafele engozini yebhasi lemota izolo emgwaqweni ovela eharare usiya echinhoyi. Ibhasi yenkampani kahulumende i ZUPCO ibikwa ingqikilane lemota ebithwele abantu ebusuku ebanket ngemva kokubana imota le izame ukudlula ilori ebihamba kancane.
Bonke abafileyo babikwa bebesemoteni le njalo abayisikhombisa babikwa bengamalunga emuli inye ekade bebevela emfeni.Ingozi yayizolo le iza kungakedluli lenyanga kwenzakale ezinye njalo ingozi zebhasi ezimbili ezitshiye ezibulalise abantu abanengi. Mhlaka 2 kuyonale inyanga kube lengozi yebhasi yako mhunga ebulalise abantu abangamatshumi amane kwathi mhlaka 9 kube lengozi yebhasi yako musanhi.
Kulabantu abalitshumi lasikhombisa abafele kulingozi. Kulekhombi njalo ebhewukileyo kumaviki amabili edluleyo erusape kwafa abantu abalitshumi lambili. Lokhu kutsho ukuthi sokufe abantu abangamatshumi ayisikhombisa lathoba munwe munye, 79 engozini ezinkulu zomgwaqo selokhu linyanga iqalileyo. Imbangela yengozi lezi emqoka ibikwa kuyimigwaqo engamanga kakuhle elizweni.
Kunjalo nje, lamuhla uhulumende usungule intuba zomgwaqo, ama Tollgates ngendlela yokubhadalisa abatshayeli imithelo ezasetshenziswa ekulungiseni imigwaqo, yona egconwa ngokubangela ingozi esezibulele abantu abanengi. Kubikwa bekulokuxokozela lamuhla emigwaqweni eya emadolobheni amakhulu elizweni kulandela ukusetshenziswa kwama Tollgates la.
Abatshayela izimota ezincinyane babhadaliswa i dola lemelika elilodwa kuntuba lezi, ikhombi ibhadaliswe amadola amabili, ibhasi amathathu kuthi i lori ibhadale amadola amahlanu.
Lokhu kutsho ukuthi imota eziya kude zibhadala imali enengi ngoba zizedlula intuba ezimbalwa. Lokhu kuhle kwabangela ukuthi abatshayeli bahle bakhweza imbadalo yamabhasi lemitshova okuphindwe phose kabili.
Intathelizindaba yethu u Thomas Chiripasi obesemgwaqweni osuka e Harare usiya eMasvingo usitshela akubonileyo.