UMongameli Jacob Zuma wele South Africa ukhuthaza uhulumende womanyano kuleli ukuba alungisise konke okusasele kusivumelwano se Global Political Agreement ukuba kwesulwe izijeziso zenotho ngendlela engaphathisa intuthuko. U Zuma utsho lokhu ngesikhathi evula umbukiso wezokulima owe Harare Agricultural Show.
UZuma utshele lumbuthano ukuba wenelise ukubamba umhlangano lenkokheli zeZimbabwe ngolweSine langolweSihlanu ebusuku ekuseni njengomgcinisihlalo wenhlanganiso ye SADC bekhuluma ngodaba lokulandelwa kwalesisivumelwano kwaphuma obala ukuba kulokuvumelana kudaba lokuba kulandelwe leso sivumelwano ngokuphangisa ukhuthaze amazwe omhlaba ukuba esule izijeziso zenotho lokunye okuphazamisa intuthuko yele Zimbabwe.
Abazi ngokwenzakalayo bathi uMnu Zuma utshele uMugabe, uTsvangirai kanye loMutambara ukuthi bahlangane ngoMvulo balungisise udala lukaGono loTomana, udaba lwabosibalukhulu bezabelo kanye lakho konke okuhluphayo kuhulumende womanyano. Wengeze wathi lezi yizinto ezilungisekayo ezimele zilungiswe yinkokheli yeZimbabwe hatshi iSADC.
UNtungamili Nkomo weStudio 7 uxhume ingcwethi ecubungula ezombusazwe uMnumzana Brilliant Mhlanga embuza ukuthi yena uthini ngalokhu.
