Icele le MDC elikhokhelwa yinhloko kahulumende uMnumzana Morgan Tsvangirai selikhuthaze umanyano weSADC ukuthi uhlaziye udaba lwezinto ezihluphayo kuhulumende womanyano emhlanganweni ozaqhutshelwa e Kinshasa kwele DRC ngeviki ezayo.
Inkuthazo le yethulwe nguTsvangirai ngokwakhe ngolweSibili emhlanganweni awuqhube lentathelizindaba. UTsvangirai usole ibandla leZanu PF esithi liqhubeka lisephula isivumelwano seGlobal Political Agreement, esabangela ukubunjwa kukahulumende womanyano.
Ukhuthaze iSadc ukuthi ihlaziye udaba lweZimbabwe emhlanganweni wayo oqala eDRC mhlaka 7 uphele mhlaka 8. Usole uMongameli Mugabe ngokwala ukufungisa osibalukhulu beMDC ukuthi baqalise umsebenzi kanye loMnu Roy Bennett yena omele abe ngumsekeli kamphathintambo wezokulima.
UTsvangirai wengeze wathi ibandla lakhe likhathazekile njalo ngokwala kukaMongameli Mugabe ukususa usibalukhulu webhanga elikhulu lelizwe ele Reserve Bank, uMnu Gideon Gono kanye lomtshutshisi omkhulu kahulumende uMnu Johannes Tomana.
