Inhlanganiso elwela amalungelo kazulu emhlabeni jikelele eyeHuman Rights Watch isola uhulumende womanyano ngokwehluleka ukuzimisela ekuguquleni umumo kudaba lokutholisa izizalwane zezimbabwe amalungelo azo, isithi ukwephulwa kwelungelo loluntu kulokhe kuqhubeka mahlayana.
Inhlanganiso le ithi eleZimbabwe liqhubeka lingahloniphi umthetho, abasekeli beMDC behlukuluzwa , amalunga alelibandla edale lephalamende ebotshwa esetheswa amacala angapheliyo.
I Human Rights Watch ikhuthaza inhlanganiso ye SADC ukuthi ithathe amanyathelo aqinileyo ukulungisa indaba yelungelo loluntu lokulungisa okusele kulenga kuhulumende womanyano, ngesikhathi kukhangelelwe ukuba lomhlangano wenhlanganiso le kwele DRC ngeviki ezayo.
Iphinde yakhuthaze njalo amazwe e European Union leleMelika ukuthi aqhubeke ephathisa abahluphekayo elizweni, lokuthi amazwe la aqhubeke ehlolisisa umumo oselizweni.
UBrenda Moyo weStudio7 ukhulume lengcwethi ecubungula ezombusazwe uMnumzana Zenzo Nkomo othi inkuthazo yeHuman Rights Watch le iyancomeka kodwa okuhluphayo kuhulumende womanyano kunengi kakhulu.
