Ukuhlukuluzwa kwabalimi abamhlophe kufike kusibanga esesabekayo liviki lapho okubulewe omunye umlimi kwatshiswa ipulazi lomunye njalo eChegutu. NgoLwesibili uNkosikazi Sophie Hart obeleminyaka engamatshumi ayisikhombisa lanhlanu oyisizalwane se South Africa utholakale efile ebotshelwe izandla evuza igazi umzimba wonke epulazini lakhe.
Kuthi ngoLwesithathu ipulazi lika Mnu. Mike Campbel elithiwa Mount Carmel litshisiwe ngabantu abangaziwayo kwawonakala impahla lezindlu ezigoqela ezabasebenzi abedlula amakhulu amabili. Amapulazi wona la okwenzakale izehlakalo lezi ayethiwe kumele uhulumende engawathathi ngumthethwandaba we SADC Tribunal Court. Kodwa umphathintambo wezemithetho uMnu. Patrick Chinamasa uthi uhulumende kasoze alandele izingqumo zalumthethwandaba ngoba engasawunanzi.
Ingcwethi kwezokulima njalo engumsekeli wesikhulumeli secele leMDC elikhokhelwa nguMnu. Arthur Mutambara, uMnu. Renson Gasela utshele iStudio 7 ukuthi lanxa amapholisa esithi izehlakalo lezi zenziwe yizikliwi nje kungela ezombusazwe kuyasolisa.
