Umhlangano weSadc obukhangelelwe ukuhlaziya okuhluphayo kuhulumende womanyano lokunye okuhluphayo ezansi yezwekazi leAfrican uqalile ngoMvulo eKinsasha kwele Democratic Republic of Congo (DRC).
Kodwa umhlangano lo awusaphathanga kabanzi udaba lweZimbabwe ngoba abakhokheli beSadc bevumelene ukuthi kuqhutshwe umhlangano opheleleyo oqondane lokuhluphayo eZimbabwe kumaviki amathathu ayazo eMaputo kwele Mozambique.
Ekhuluma eKinsasha emhlanganweni wangoMvulo, uMongameli Jacob Zuma wele South Africa - onikeze ubukhokheli be Sadc kuMongameli Josepha Kabila wele DRC - ukhuthaze inkokheli yamabandla akuhulumende womanyano ukuthi ikhulumisane kulungisiswe okuhluphayo.
UMongameli Kabila yena ugcizelele amazwi kazuma esithi abakhokheli bezwekazi leAfrica kumele beqakathekise uzibuse okhululekileyo. UMongameli Mugabe lenhloko kahulumende uMnu Morgan Tsvangirai bebekhona emhlanganweni lo, wona ophela ngoLwesibili.
Icele leMDC elikhokhelwa nguMnu Arthur Mutambara lalo liphathekile. Isikhulumeli sikaMnu Tsvangirai uMnu James uthe udaba lweZimbabwe alukhulunywanga kabanzi ngalo ngoba bekungelasikhathi esaneleyo.
Ingcwethi ecubungula ezombusazwe uMnu George Mkhwanazi uthi iSadc yenze kuhle ngokuthi ibizele umhlangano obhekane leZimbabwe kuphela. Uthi lokhu kuzanikeza iSadc ithuba elaneleyo lokuthi ihlaziye ngokugcweleyo konke okuhluphayo kuhulumende womnyano.
