Inhlanganiso elwela ukulondolozwa kwelungelo loluntu emhlabeni jikelele, i Human Rights Watch ithi amazwe angentshonalanga kamelanga esule izijeziso azethulele uhulumende weZanu PF ngoba eleZimbabwe liqhubeka ngokwephula amalungelo kazulu.
Embikweni awethule ngoLwesine, uNkosikazi Georgette Gagnon, obona ngokuqhutshwa kwenhlelo zalinhlanganiso emazweni akuzwekazi leAfrica, ukhuthaze eleZimbabwe ukuthi liqale litshengise ukuzinikela kudaba lokulondolozwa kwelungelo loluntu nxa lifuna izijeziso zesulwe.
Imibiko ye Human Rights Watch le ibiqondiswe kunkuthazo enziwe yiSadc ngoLwesibili eyokuthi amazwe afana leBhilithani leMelika asuse izijeziso lezi ngoba zisenqabela uhulumende womanyano ukuthi avuselele inotho yelizwe.
UNkosikazi Gagnon uthi uhulumende womanyano kumele esule imithetho encindezelayo njalo etshiyane lombuso woncindezelo nxa efuna izijeziso lezi zikhitshwe. Amazwe athize angentshonalanga ethulele abe Zanu PF abanengi izijeziso eminyakeni edluleyo ezibavimba ukwethekelela kiwo kanye lokugcina izimali zabo emabhanga akulawa mazwe.
Igqwetha elilwela ilungelo loluntu uNkosazana Annah Moyo uthi uvumelana leHuman Rights Watch ekuthini izijeziso lezi ziqhubeke zikhona andubana iZanu PF itshiyane lokungahloniphi ilungelo loluntu.
