Inholoko kahulumende uMnu Morgan Tsvangirai, yena okoBulawayo okwamanje ukhangelelwe ukuhlangana lequla le European Union ngoMgqibelo kuleli dolobho.
UTsvangirai ukhangelwe njalo ukuphatheka emhlanganweni webandla lakhe owe National Executive ngaphambilini kowe National Council ngeSonto. Injongo yemihlangano le ngeyokuhluza ukusebenzelana phakathi kwe MDC leZanu PF kuhulumende womanyano.
Eqeda umhlangano weNational Council ngeSonto, uMnu Tsvangirai uzakwenza i rally yebandla lakhe enkundleni ye White City koBulawayo.
NgoLwesihlanu khona uTsvangirai uqhube umhlangano lozulu wakobulawayo echasisa ngokusebenza kuka hulumende womanyano, esizwa njalo izikhalazo zezakhamizi zaleli dolobho.
Umphathintambo obona ngenhlelo zamanzi njalo eyisiphathamandla secele leMDC elikhokhelwa nguTsvangirai, uMnu Sam Sipepa Nkomo usichasisele okunengi ngalumhlangano kanye lenhlelo zikaTsvangirai zangempelasonto.
