Ezemfundo ziqhubeka zibhidlika ngamandla elizweni ngenxa yokukhalala umsebenzi kwababalisi abafuna ukwengezelelwa iholo. ababablisi abangamalunga enhlanganiso ye Zimbabwe Teachers Association- ZIMTA bakhalale umsebenzi ekuvulweni kwezikolo mhlaka 2 kuyonale inyanga, kudqalisa i term yesithathu.
Uhulumende uthi kala mali yokwengezelela ababalisi iholo. Umphathintambo wezemfundo uMnumzana David Coltart uthi laye usephelelwe licebo lokuthi engabuyisela njani ababalisi ezikolo. Kodwa ababalisi abangamalunga enhlanganiso ye Progressive Teachers Union of Zimbabwe-PTUZ bathi bazaqhubeka bekhalala umsebenzi ngolweSine langolweSihlanu maviki onke.
Sikhulume lesiphathamandla senhlanganiso ye PTUZ uMnumzana Vusumuzi Mahlangu othi ababalisi abangamalunga enhlanganiso yakhe bazaqhubeka ngokukhalala umsebenzi okwamalanga amabili ngeviki, uhulumende aze alungisise izikhalazo zabo.
Siphinde saxhuma osaphethe isikhundla sikamqondisi wenhlanganiso ye ZIMTA uMnumzana Sifiso Ndlovu othi inhlanganiso yakhe ilomhlangano omkhulu kusasa ntambama wokuhlaziya ukuthi ababalisi baqhubeke na bekhalala umsebenzi.
Kunjalo nje ingcwethi kwezemfundo uMnumzana Isaac Mpofu ongumlobi wezingwalo uthi abantwana abalahlekelwe yimfundo, ikusasa labo limnyama.
