Abakhokheli bamabandla akuhulumende abathi uMongameli Mugabe, uMnu Morgan Tsvangirai loMnu Arthur Mutambara sebevumelene ukuthi ugatsha oluthiwa yimanagement committee lube yilo olukhokhela uhlelo lokulotshwa kwesisekelo sombuso esitsha.
Bathi njalo likhomidi izabona ukuthi i iparliamentary select committee kanye lama thematic sub-committes aqhuba njani umsebenzi.
Abathathu laba babe lomhlangano ngoLwesine eHarare bencedisana labameli bamabandla abo kunkulumo ezilethe uhulumende womanyano bavumelana njalo ukukhetha uMnu Phineas Makurane owe National University of Science and Technology (NUST) loMnu Hope Sadza ukuthi bangene ku steering committee bemela abenhlanganiso ezizimeleyo.
UMnu Tsvangirai yena ube lomhlangano namuhla lababenhlanganiso ezizimele zodwa eHarare echasisa ngenguquko abavumelane phezu kwayo le.
Ingcwethi ecubungula ezombusazwe uMnu Mandlenkosi Gatsheni uthi inguquko le ayisoze iguqule lutho ngoba uhlelo lolu, lulokhu lukhokheklwa ngabezombusazwe.
KUnjalo nje, umphathintambo obona ngezemithetho uMnu Patrick Chinamasa ubikwa esithi uhulumende kalayo imali eneleyo eyokuthi aqhube uhlelo lokulotshwa kwesisekelo sombuso esitsha lolu.
USenator Gladys Dube, olilunga lekomidi ebona ngokulotshwa kwesisekelo sombuso esitsha utshele uSithandekile Mhlanga weStudio 7 ukuthi ukuswelakala kwemali lokhu akubakhathazi kangako okwamanje.
