Icele leMDC elikhokhelwa nguMnu Morgan Tsvangirai lithi lisola kakhulu ukuthathelwa kwabalimi abamhlophe amapulazi abo okulokhu kuqhubeka endaweni ezitshiyeneyo zelizwe ikakhulu esigabeni seMasvingo.
Ibandla leli lithi iziphathamandla zeZanu PF ziphatheke kakhulu kulezinsuku ngokuthathela abamhlophe amapulazi abo eChiredzi kanye leMwenezi esigabeni seMasvingo zisebenzisa udlakela.
I MDC ithi njalo uhlelo lweZanu PF lolu luphazamisa kakhulu imizamo yokuqeda indlala elizweni.
Inhlanganiso yeFEWSNET yona ibike ngoLwesithathu ukuthi indlala izabhaha ngamandla kweleMandebeleni ngenyanga ezayo.
Umsekeli wesikhulumeli seMDC ekhokhelwa nguTsvangirai uNkosazana Thabitha Khumalo usole ibandla leZanu PF ngokumemethekisa uhlelo lokuhluthunwa kwamapulazi abamhlophe.
Kodwa umphathintambo obona ngokwenzakala emawofisini kaMongameli Robert Mugabe uMnu Didymus Mutasa utshele lumsakazo ukuthi uhlelo lokuhluthunwa kwamapulazi lolu luzaqhubeka, kungelani lokukhonona kwabalimi abamhlophe leMDC.
Ingcwethi ecubungula ezombusazwe uMnu Zenzo Nkomo utshele uNtungamili Nkomo weStudio 7 ukuthi okwenzakala emapulazini kuphazamisa kakhulu imizamo yokulwisana lendlala elizweni.
