Inhlanganiso yamagcwetha amela amalungelo abantu eye Zimbabwe Lawyers for Human Rights ithi imisebenzi yegcwetha elikhulu lika hulumende uMnumzana Johannes Thomana leziphathamandla zakhe sokumele ihlolisiswe ngoba ekhanya esebenza engalandeli iziqondiso zomthetho eziqondileyo.
Ekhuluma lentathelizindaba e Harare umqondisi we Zimbabwe Lawyers for Human Rights uNkosikazi Irene Petras uthe okwenzakale kuNkosazana Jestina Mukoko kugoqela ukuthunjwa lokuhlukuluzwa akwenzayo ngabacuphi bekungamelanga kwamukeleke phambi kwabantu abakwaziyo ukuquba umsebenzi wabo ngenfanelo. Uthe abatshutshisi labanye nje abantu abephula amalungelo abantu kumele bazi kusukela manje ukuba amadale kasoze emukele ukuphazamiswa kwamalungelo abantu santando ngoba kungela muntu ongaphezu komthetho kuhlanganisela lengatsha zikahulumende lezisebenzi zazo.
