Usibalukhulu webhanga elikhulu lelizwe I Reserve Bank of Zimbabwe uMnumzana Gideon Gono wethesa umphathintambo wezemali uMnumzana Tendai Biti, umlandu wokuphuza ukusebenzisa imali engange zigidi ezedlula amakhulu amahlanu amadollar eMelika-us$510 million, evele enhlanganisweni ye International Monetary Fund.
Ugono uthi uBiti lokhe ebambelele njalo kweyinye imali evele kubhanga le African Export-Import bank esithi imali yonke uBiti ayigcinileyo iyedlula izigidi ezingamakhulu athoba minwe mbili-us$810 million.
Kodwa umphathintambo wezemali uBiti uthi imali le kumele ihlalelwe phansi kuqoqwe ukuthi izasetshenziswa njani kubudget azayenza umnyaka ungakapheli. UBiti uthi uhulumende kuzamele abe nguye ovumelana ukuthi imali le isetshenziswe ngaiphi indlela.
Ukuhlaziya impi elokhe iqhubeka phakathi kuka Gono loBiti UBrenda Moyo weStudio 7 uxhume ingcwethi kwezenotho uMnumzana Walter Nsununguli Mbongolwane othi uGono ubesejwayele ukusebenza ezibusa angani elizweni bekungela mphathintambo wezemali.
