Amabhanga amanengi awe Zimbabwe akhanya ezama ngamandla wonke ukuthi abelemali efunwa libhanga elikhulu lelizwe iReserve Bank of Zimbabwe (RBZ) eselifake umthetho wokuthi wonke amabhanga kumele abe lemali njalo lenotho ethe xaxa ekupheleni kwenyanga kaMpandula.
Kusungulwa uMfumfu, amabhanga bekumele abe lemali engange zigidi ezedlula eziyisithupha zamadola eMelika (US$6.25 million) kubesokusithi ekupheleni kukaMbimbitho emnyakeni ozayo abe lamadola eMelika ayizigidi ezilitshumi lengxenye (US$12.5 million).
Ingcwethi zenotho zithi amabhanga anjenge Commercial Bank of Zimbabwe, Barclays, Stanbic le Standard Chartered lamanye amanenganyana angenelisa ukuthi abelemali efunwa yi RBZ kodwa kuzaba nzima kwamanye.
Ingcwethi ecubungula ezenotho umnumzana Eric Block uthi malutshwana amabhanga angehluleka ukuthola limali kodwa kawasoze avalwe. Kodwa-ke eyinye yezingcwethi ezicubungula ezenotho langezombusazwe uMnumzana Bekithemba Mhlanga utshele uGibbs Dube we Studio 7 ukuthi kunzima ukuthi amabhanga enelise ukuba lemali efunwa yi RBZ ngoba izinto kazimanga kuhle eZimbabwe.
Kusenjalo, osomabhizimisi bathi isiqondiso seRBZ siyamangalisa ngoba lalo lelibhanga lingelayo leyo mali elikhuluma ngayo.
UGibbs Dube uphinde waxoxa lomunye wabo sobhizimisi uMnumzana Michael Bathandi Mpofu othi usiba lukhulu we RBZ kathenjwa ngakho-ke ngesinqumo sakhe lesi amabhanga amanengi eZmbabwe angacina esegayisa imali njenga labo okuthiwa ngosiphatheleni abathengisa imali emadolobheni.
