UMongameli Robert Mugabe sesole kakhulu amazwe angentshonalanga esithi asebenzisa imisakazo yeZimbabwe esakaza ingaphandle kwelizwe ukuzama ukumgenqula esikhundleni.
UMugabe wethule amazwi la emhlanganweni obuphathelane lokuhanjiswa kwemibiko kanye lokusetshenziswa kwemitshina yamacomputer oqhutshelwe kweleSwitzerland ngoLwesithathu yinhlanganiso ye International Telecommunications Union.
Laloba uMugabe engacacanga ukuthi yiphi imisakazo le, kusobala ukuthi ubekhuluma ngemisakazo efana lawonalo oweStudio 7, iSW Radio Africa esakaza iseLondon kanye leRadio VOP, esakaza iseCape Town kwele South Africa.
Kodwa ingcwethi ecubungula ezombusazwe uMnu Brilliant Mhlanga utshele uNtungamili Nkomo weStudio 7 ukuthi kavumelani lembiko kaMugabe esithi nxa uMugabe engafuni ukuthi imisakazo le ibekhona, kayinikeze phela imvumo iyesakaza iseZimbabwe.
Silokhu sikudaba lunye, ukulokuxokozela kubikwa kusiya phambili kudaba lokukhethwa kwamalunga amakomidi abona ngokwethulwa kwemibiko, athi iZimbabwe Broadcasting Authority leZimbabwe Media Commission, ngoba inengi lamalunga la engaweZanu PF.
Ukuhlazila loludaba sixoxe loMnu Useni Sibanda ongomunye obikwa ekhethwe ukungena kukomidi yeZimbabwe
Media Commission lengcwethi ecubungula ezombusazwe, uMnu Busani Ncube.
UMnu Sibanda usungule ingxoxo yethu ngokuchasisela uSithandekile Mhlanga weStudio 7 ngendlela abakhethwe ngayo yikomidi yephalamende eyeStanding Rules and Orders, ebona ngaloluhlelo.
