Ikomidi yedale lephalamende, iCommittee on Standing Rules and Orders ibuzisise abantu abangamatshumi amathathu lantathu (33) ngoMvulo abafuna ukuba ngosikomitshi bogatsha olubona ngokulondolozwa kwelungelo loluntu, iHuman Rights Commission.
Abanye babantu laba bagoqela igqwetha elilodumo uMnu Kucaca phulu, oke waba ngusodolobho wakoBulawayo, uMnu Japhet Ndabeni Ncube, ilunga leZanu PF Politburo, uMnu Joshua Malinga, uMnu Douglas Gwatidzo labanye; kubike intathelizindaba yethu uMark P. Nthambe.
Ilunga leCommitte on Standing Rules and Orders, uMnu Edward Mkhosi wazise lumsakazo ukuthi ikomidi le izakhetha amabizo alitshumi lasithupha (16) ngoLwesibili ezawahambisa kuMongameli Robert Mugabe ukuze akhethe ayithoba minwemibili afunakalayo.
Igqwetha elilwela ilungelo loluntu uNkosazana Annah Moyo utshele uNtungamili Nkomo weStudio 7 ukuthi abantu okumele bangene kukomishini le, ngabantu abalolwazi ngendaba zamalungelo oluntu hatshi abezombusazwe kuphela.
