Inhloko kahulumende njalo engumkhokheli welinye lamacele eMDC uMnu Morgan Tsvangirai sekhuthaze amazwe angentshonalanga ukuthi engezelele uncedo lokuthuthukisa ilizwe alupha eleZimbabwe njalo esuse zonke izikhubeko ezenqabela linthuthuko.
Izikhubeko lezi zigoqela izijeziso ezethulelwe uMongameli Robert Mugabe leziphathamandla zebandla lakhe eleZanu PF ngamazwe angentshonalanga afana leMelika leBhilithani, eminyakeni edluleyo.
UTsvangirai wethule amazwi la ngeSonto. Ekhuluma ngelanga elifanayo, umgcinisihlalo wogatsha lwabesifazana kubandla likaTsvangirai, uNkosikazi Theresa Makone utshele abasekeli bebandla leli eBikita ukuthi izijeziso lezi akumelanga zesulwe.
Amacele womabili eMDC avumelana leZanu PF kusivumelwano sokubumba uhulumende womanyano nyakenye ukuthi azakhankasela ukususwa kwezijeziso lezi.
Ingcwethi ecubungula ezombusazwe uMnu Mandlenkosi Gatsheni utshele uNtungamili Nkomo weStudio 7 ukuthi ukwehlukana kwamazwi kaTsvangirai loNkosikazi Makone kuchaya sobala ukungavumelani okukhona kulelibandla phezu kodaba lwezijeziso.
