Isitolo esikhulu sezokudla kwele South Africa ese Shoprite, sithi sesimise zonke inhlelo zokuqhelisa amabhizimusi eZimbabwe kukanti inkampani yezokulima eye Agri-SA isixwayise uhulumende wele South Africa ukuthi angalobelani leZimbabwe isivumelwano sokutshalwa kwezimali nxa udaba lomhlabathi lungafakwanga kuso.
Ukwehluleka kukahulumende weZimbabwe ukuqinisekisa ukuthi impahla zabafuna ukusungula amabhizimusi elizweni zivikeleke ngokuqotho, kuqhubekela phambili kusenqabela abakwele South Africa abafuna ukusungula amabhizimusi eZimbabwe.
Enye yamankampani amakhulu kwezokudla kwele South Africa eye Shoprite ithi isimise zonke inhlelo zayo zokutshala imali eZimbabwe. Linkampani ithi lokhu kubangelwe yisimo sezomnotho esilokhu sibuvilibana eZimbabwe, kanye lezombusazwe okulokhu zingacaci ukuthi zizaphetha njani.
