Ikomidi yedale lephamende eyeStanding Rules and Orders siqoqe uluhlu lwamagama abantu abalitshumi lasithupha oluzanikezwa uMongameli Robert Mugabe ukuthi akhethe labo abazangena kukomishini ebona ngezelungelo loluntu, iHuman Rights Commission.
Uluhlu lolu lulamabizo alitshumi lasithupha akhethwe kwangamatshumi amathathu lantathu abantu ababuzisiswe yikomidi yephalamende le ngoMvulo ekade befuna ukuba ngosikomitshi balikomishini.
Abanye abakuluhlu oluzahanjiswa kuMugabe lolu bagoqela igqwetha uMnu Kucaca Phulu, uMnu Japhet Ndabeni Ncube, yena owake waba ngusodolobho wakoBulawayo, uMnu Jacob Mudenda owake waba ngusibalukhulu wesabelo seMatabeleland North, uMnu Douglas Gwatidzo labanye.
Abanye ngabathi uEllen Sithole ofundisa eUniversity of Zimbabwe lodadewabo uIrene Sithole oligqwetha, uBenhilda Makomva, uNomathemba Neseni, uKwanele Jirira, uSethulo Ncube, uEunice Velepini, uElasto Mugwadi, uStewart Nyakotyo, uJoseph Kurebwa loTemba khombe.
UMugabe uzakhetha abantu abayithoba minwe mibili kwabalitshumi lasithupha laba, okuyibo abazakuba ngosikomitshi ababona ngokulondolozwa kwelungelo loluntu elizweni.
Ilunga leStanding Rules and Orders uMnu Edward Mkhosi, yena omela iMangwe edaleni lephalamende utshele uNtungamili Nkomo weStudio 7 ukuthi uluhlu lwamabizo lolu luzanikezwa uMongameli Mugabe kusikhatshana esizayo.