Ukuthethwa kwecala eletheswa isiphathamandla secele leMDC elikhokhelwa nguMnu. Morgan Tsvangirai, uMnu. Roy Bennett obekumele kuqale ngoMvulo sekudluliselwe phambili ukuze lithethwe ngenyanga ezayo mhlaka 9. UBennett wetheswa icala lokutholakala elezikhali ngenjongo yokugengqula uhulumende.
Amagqwetha kaBennett enelisile ukukhombisa umthethwandaba ukuthi bekumele uBennett anikwe insuku zokulungiselela ubufakazi bakhe. Abatshutshisi bathi sebelobufakazi bemfanekiso kamabonakude lobufakazi obukumakhalekhukwini obutshengisa ukuthi mpela uBennett wayefuna ukugengqula uhulumende.
UBennett oke wavalelwa okomnyaka ngemva kokufuqana loMnu. Patrick Chinamasa edale lephalamende ubeseke wavalelwa owensuku ezimbili. UChris Gande weStudio 7 uxoxe lengcwethi ecubungula ezemithetho, uMnu. Job Sibanda ukuze sizwe imbono yakhe ngalelicala.
