amalinks wokungena

Breaking News

UMnu Tsvangirai Ukhulumisana Lenkokheli YeSadc Ngodaba LweZimbabwe


Umkhokheli welinye lamacele eMDC, uMnu Morgan Tsvangirai uzahlangana ngoLwesibili lomgcinisihlalo weSadc Troika, uMongameli Armando Guebuza weleMozambique emazisa ngokuphuma nganxanye kwebandla lakhe kuhulumende womanyano.

UTsvangirai ulubhekise kweleMozambique ngoMvulo ukuyakhulumisana loGuebuza edinga uncedo lwamacebo mayelana ngokuhluphayo kuhulumende womanyano lo, obunjwa libandla lakhe leinye icele leMDC le Zanu Pf.

Esuka eMozambique uTsvangirai uzakuya kweleDRC ukuyakhulumisana lomgcinisihlalo weSadc ngokwayo, uMongameli Joseph Kabila ecela ukuthi iSadc ingenele ngokuphangisa ibambe iZanu PF ngamandla ukuthi igcwalise isivumelwano seGlobal Political Agreement.

Ibandla likaTsvangirai lazise ngoLwesihlanu ukuthi kalisoze libe lisaphatheka kunhlelo zedale leCabinet kanye leCouncil of Ministers kuze kulungisiswe konke okuhluphayo kuhulumende womanyano.

Ibandla leli lithi kalisoze liye emhlanganweni weCabinet okhona ngoLwesibili. Kodwa isikhulumeli sikaMongameli Robert Mugabe uMnumzana George Charamba uthi iZanu PF izaqhubekela phambili ngomhlangano lo kungakhathalekile ukuthi iMDC ikhona kumbe hatshi.

Umabhalane weSadc uMnu Tomaz Salomao uthi iSadc iphatheke kakubi ngokwenzakala eZimbabwe. Wengezelele wathi umanyano lo uzathatha izixwayiso zikaGuebuza ngemva kokukhulumisana loTsvangirai.

Umphathintambo obona ngokwenzakala emawofisini kaMnu Tsvangirai, uMnu Gorden Moyo uthi ibandla lakhe lizaqhubeka lingaphatheki kunhlelo zikahulumende, esithi kalisoze linanze izinqumo ezilakho ukuthathwa ngamalunga eZanu PF ewodwa kuCabinet.

Ingcwethi ecubungula ezombusazwe uMnu George Mkhwanazi utshele uNtungamili Nkomo weStudio 7 ukuthi kaboni inkokheli yeSadc ithathela uMongameli Mugabe lebandla lakhe leZanu PF amanyathelo aqinileyo.

Ezinye indaba zeStudio 7...

‚Äč
XS
SM
MD
LG